Kansanvalistusseura-fondd

Čuõvtõõzz teeʹmmeeʹjj 2024 äjšmõʹttjen lij Lääʹddjânnam puärrsummus čuõvtemtuâj da jieʹllemâkksaž mättjummuž foond, Kansanvalistusseura, 150-eeʹjjprääʹzneǩeeʹǩǩ.

Čuõvtõõzz pââlteʹmes peälšteei

Kansanvalistusseura-fondd lij vuâđđuum eeʹjj 1874, da tõt lij jânnam puärrsummus, čõnnsâʹttem čuõvtõsfondd. Kansanvalistusseura-fondd lij pâi leämmaž smeʹllkõs čuõvtemtuâj oouʹdeei Lääʹddjânnam raaji åålǥpeäʹlnn še.

Kansanvalistusseura-fondd tåimm luõvâs čuõvtemtuâj da jieʹllemâkksaž mättjummuž äʹšštobddjen oouʹdeeʹl jieʹllemâkksaž mättjummuž čåuddmõõžžid õõutveäkka õhttsažtuâjjkuõiʹmeesvuiʹm.

Mättjummuš, innovaatio da vaaiktummuš lie foond tääʹrǩmõs silttummuš. Kansanvalistusseura-fondd nuäjjââtt tuâjstes tuʹtǩǩummša da ođđsummus tiõttu. Foondâst oouʹdeet čõõđ ääiʹj tuejjeemtääʹzz innovaatioid jeeʹresnallšem haʹŋǩǩõõzzin Lääʹddjânnmest da pirr maaiʹlm.

Saaǥǥtummuš da vaaiktemtuâjj

Kansanvalistusseura-fondd õlmstâtt kueʹhtt pukid ääv mättjummuž media: Aikuiskasvatus-tiõđlõõst da eŋgglõsǩiõllsaž vuõrâsoummiškooultõõzz Elm Magazine -media.

Lââʹssen tõt vaʹsttad Saujj-Heʹlssen meerlažškooul da ålgglääʹdd päärnai Etäkoulu Kulkuri da Nomadskolan toiʹmmjummšest di Euroopp vuõrâsoummiškooultõsorganisaatio EAEA (European Association for the Education of Adults) saaǥǥtummšest.

Kansanvalistusseura-fondd õlmstâtt še Sivistyksen pelottomat -bloog.

Eettla vuâđđjurddi

Foond eettla vuâđđjurddi linjjee tõn arggtuâj da äjšmâʹtte še õhttsažtuâjjkuõiʹmid toiʹmmjed vuâđđjurddji meâldlânji.